ਵਿਸ਼ਵੀਕਰਨ ਦੇ ਪ੍ਰਭਾਵੀ ਅਤੇ ਸੰਭਾਵੀ ਨਤੀਜਿਆ ਕਾਰਨ ਮਨੁੱਖੀ ਸੋਚ ਵਿਚ ਕਾਫ਼ੀ ਪਰਿਵਰਤਨ ਆਇਆ ਹੈ। ਬਦਲ ਰਹੇ ਸਮਾਜਿਕ ਅਤੇ ਆਰਥਿਕ ਢਾਂਚੇ ਅਧੀਨ ਮਨੁੱਖ ਆਪਣੇ ਵਿਅਕਤੀਤਵ ਪ੍ਰਤੀ ਚਿੰਤਤ ਨਜ਼ਰ ਆਉਂਦਾ ਹੈ। ਖ਼ਾਸ ਤੌਰ ‘ਤੇ ਹਾਸ਼ੀਆਗਤ ਸਮਝੀਆਂ ਜਾਂਦੀਆਂ ਧਿਰਾਂ ਇਸ ਮੰਡੀ ਦੇ ਯੁੱਗ ਵਿਚ ਆਪਣੇ ਆਪ ਨੂੰ ਸਥਾਪਿਤ ਕਰਨ ਦੇ ਆਹੁਰ ਕਰਨ ਲੱਗੀਆਂ ਹਨ। ਇਸ ਪ੍ਰਸਤਾਵਿਤ ਖੋਜ-ਪੱਤਰ ਦਾ ਵਿਸ਼ਾ ਵਿਸ਼ਵੀਕਰਨ ਦੇ ਦੌਰ ਵਿਚ ਪੈਦਾ ਹੋ ਰਹੀ ਨਾਰੀ ਚੇਤਨਾ ਨੂੰ ਤ੍ਰਿਪਤਾ ਕੇ ਸਿੰਘ ਦੇ ਕਹਾਣੀ ਸੰਗ੍ਰਹਿ ਦੇ ਸੰਦਰਭ ਵਿਚ ਸਮਝਣਾ ਹੈ। ਤ੍ਰਿਪਤਾ ਕੇ ਸਿੰਘ ਇਸ ਨਵੇਂ ਦੌਰ ਦੀ ਪ੍ਰਬੁੱਧ ਕਹਾਣੀਕਾਰਾ ਹੈ, ਜਿਸਨੇ ਆਪਣੇ ਇੱਕੋ ਇੱਕ ਕਹਾਣੀ ਸੰਗ੍ਰਹਿ ‘ਇਕ ਦਿਨ’ ਰਾਹੀਂ ਪਾਠਕਾਂ ਅਤੇ ਆਲੋਚਕਾਂ ਦਾ ਧਿਆਨ ਖਿੱਚਿਆ ਹੈ। ਤ੍ਰਿਪਤਾ ਕੇ ਸਿੰਘ ਦੀਆਂ ਕਹਾਣੀਆਂ ਅਜੋਕੀ ਨਾਰੀ ਦੇ ਅਜਿਹੇ ਬਿੰਬ ਨੂੰ ਉਘਾੜਦੀਆਂ ਹਨ ਜੋ ਨਾ ਤਾਂ ਮਰਦ ਵਿਰੋਧੀ ਭਾਵਨਾ ਰੱਖਦੀ ਹੈ ਅਤੇ ਨਾ ਹੀ ਪਰਿਵਾਰਿਕ ਰਿਸ਼ਤਿਆਂ ਨੂੰ ਤਿਲਾਂਜਲੀ ਦੇ ਕੇ ਆਪਣੇ ਮਕਸਦ ਵਿਚ ਕਾਮਯਾਬ ਹੁੰਦੀ ਹੈ, ਸਗੋਂ ਇਹ ਨਾਰੀ ਪਤੀ, ਪਰਿਵਾਰ ਅਤੇ ਸਮਾਜ ਪ੍ਰਤੀ ਵਫ਼ਾਦਾਰੀ ਪਾਲਦੀ ਹੋਈ ਪਿਤਰੀ ਸੱਤਾ ਦੀ ਉਸ ਸੋਚ ਨੂੰ ਸੱਟ ਮਾਰਦੀ ਹੈ ਜਿਸ ਵਿਚ ਔਰਤ ਅਤੇ ਮਰਦ ਦੋਵੇਂ ਹੀ ਜਕੜੇ ਹੋਏ ਹਨ।