‘ਕਿਰਪਾਲ ਕਜ਼ਾਕ ਸ਼ਹਿਰੀ ਮਾਨਵੀ ਦ੍ਰਿਸ਼ਟੀਕੋਣ, ਨਿੱਜ ਦੇ ਅਨੁਭਵ ਸੂਖਮ ਕਲਾਤਮਕ ਸੂਝ, ਵਲੂੰਧਰੇ ਪਲਾਂ ਦੀ ਕਸੀਦਾਕਾਰੀ ਕਰਨ ਅਤੇ ਨਿਵੇਕਲੇ-ਸੁਰ ਅਤੇ ਅੰਦਾਜ ਕਰਕੇ ਕਹਾਣੀ ਜਗਤ ਵਿਚ ਆਪਣੀ ਵੱਖਰੀ ਨੁਹਾਰ ਅਤੇ ਪਹਿਚਾਣ ਸਥਾਪਿਤ ਕਰ ਚੁੱਕਾ ਕਹਾਣੀਕਾਰ ਹੈ। ਉਸਨੇ ਥੋੜ੍ਹਾ ਲਿਖਿਆ ਪਰ ਜੋ ਵੀ ਲਿਖਿਆ ਉਸਨੇ ਕਹਾਣੀ ਦੇ ਇਤਿਹਾਸ ਵਿਚ ਗੁਣਾਤਮਕ ਵਾਧਾ ਕੀਤਾ ਹੈ। ਕਿਰਪਾਲ ਕਜ਼ਾਕ ਇੱਕ ਅਜਿਹਾ ਕਹਾਣੀਕਾਰ ਹੈ ਜਿਸਨੇ ਜਿੰਦਗੀ ਦੀਆਂ ਤ੍ਰਾਸਦਿਕ ਹਕੀਕਤਾਂ ਵਿਚੋਂ ਗੁਜ਼ਰਦੇ ਹੋਏ ਤ੍ਰਾਸਦਿਕ ਸਥਿਤੀਆਂ ਨੂੰ ਆਪਣੇ ਪਿੰਡੇ ਤੇ ਹੰਢਾਇਆ ਤੇ ਕਈ ਕੌੜੇ ਅਨੁਭਵ ਗ੍ਰਹਿਣ ਕੀਤੇ। ਕਜ਼ਾਕ ਨੇ ਆਪਣੀ ਰਚਨਾਤਮਕ ਸ਼ਕਤੀ ਦਾ ਸ੍ਰੋਤ ਜਿੰਦਗੀ ਦੇ ਅਨੁਭਵ ਕੀਤੇ ਇਨ੍ਹਾ ਕੌੜੇ ਅਨੁਭਵਾਂ ਨੂੰ ਬਣਾਇਆ ਤੇ ਬੜੀ ਸ਼ਿੱਦਤ ਨਾਲ ਆਪਣੀਆਂ ਕਹਾਣੀਆਂ ਵਿੱਚ ਸਿਰਜਿਆ ਹੈ। ਕਿਰਪਾਲ ਕਜ਼ਾਕ ਨੇ ਅੰਤਹੀਣ ਕਹਾਣੀ ਸੰਗ੍ਰਹਿ ਰਾਂਹੀ 21ਵੀਂ ਸਦੀ ਦੇ ਮਨੁੱਖ ਦੇ ਸੱਚ ਨੂੰ ਬੜੇ ਬੇਬਾਕੀ ਨਾਲ ਸਿਰਜ ਕੇ ਆਧੁਨਿਕ ਪੂੰਜੀਵਾਦੀ ਸਮਾਜ ਤੇ ਵਿਅੰਗ ਕਸਿਆ ਹੈ ਤੇ ਮਨੁੱਖ ਦੀਆਂ ਭਾਵਨਾਵਾਂ ਨੂੰ ਝੰਜੋੜਨ ਦੀ ਕੋਸ਼ਿਸ਼ ਕੀਤੀ ਹੈ।