ਉੱਤਰ-ਆਧੁਨਿਕਤਾ ਆਧੁਨਿਕਤਾ ਦੀ ਆੜ ਵਿਚ ਆਪਣੀ ਉੱਚਤਤਾ ਦੀ ਬਰਕਰਾਰੀ ਲਈ ਸਥਾਪਿਤ ਹੋਈਆਂ ਪਰੰਪਰਿਕ ਧਾਰਨਾਵਾਂ, ਪਰਮ ਬਿਰਤਾਂਤਾਂ, ਵਿਸ਼ੇਸ਼ ਸਮੂਹਾਂ, ਸੱਭਿਆਚਾਰਾਂ, ਭਾਸ਼ਾਵਾਂ, ਖਿੱਤਿਆ ਆਦਿ ਦੇ ਵਿਰੋਧ ਅਤੇ ਲਘੂ-ਬਿਰਤਾਂਤਾਂ ਅਣਗੌਲੇ ਸਮੂਹਾਂ, ਸਥਾਨਕ ਸੱਭਿਆਚਾਰਾਂ, ਭਾਸ਼ਾਵਾਂ ਖਿੱਤਿਆਂ ਆਦਿ ਦੇ ਹੱਕ ਵਿਚ ਸਥਾਨਕਤਾ, ਵਿਕੇਂਦਰੀਕਰਨ ਅਤੇ ਵੱਖਰਤਾ ਦੀ ਗੱਲ ਕਰਦੀ ਹੈ। ਮਹਾਂ-ਬਿਰਤਾਂਤਾਂ ਦੁਆਰਾ ਜਿਹੜੇ ਲਘੂ-ਬਿਰਤਾਂਤਾਂ ਉੱਪਰ ਹਮੇਸ਼ਾਂ ਇਕਰੂਪਤਾ ਦੀ ਧਾਰਨਾ ਥੋਪੀ ਗਈ ਹੈ। ਉਹਨਾਂ ਲਘੂ-ਬਿਰਤਾਂਤਾਂ ਵਿਚ ਵਿਸ਼ਵੀ ਗਿਆਨ ਹੋਣ ਨਾਲ ਆਪਣੀ ਵੱਖਰੀ ਹੋਂਦ ਕਾਇਮ ਹੈ। ਹਰੇਕ ਲਘੂ-ਬਿਰਤਾਂਤ ਦੀ ਆਪਣੀ ਵਿਆਖਿਆ, ਲੱਛਣ ਤੇ ਗੁਣ ਹੈ। ਜੋ ਉਹਨਾਂ ਦੀ ਸਥਾਨਕਤਾ ਵਿਚ ਨਿਹਿਤ ਹੈ। ਉੱਤਰ-ਆਧੁਨਿਕਤਾ ਇਹਨਾਂ ਹਾਸ਼ੀਆਗਤ ਧਿਰਾਂ ਨੂੰ ਆਪਣੀ ਹੋਂਦ ਤੋਂ ਜਾਣੂ ਕਰਾਉਂਦੀ ਹੈ। ਸਰੂਪ ਸਿਆਲਵੀ ਨੇ ਆਪਣੀਆਂ ਕਹਾਣੀਆਂ ਰਾਹੀਂ ਮੁੱਖ ਸਮੂਹਾਂ ਦੁਆਰਾ ਛੋਟੇ ਸਮੂਹਾਂ ਦੇ ਗੌਰਵਸ਼ਾਲੀ ਇਤਿਹਾਸਕ ਨਾਇਕਾਂ ਨੂੰ ਆਪਣੀ ਇਕਰੂਪਤਾ ਨਾਲ ਦਬਾਅ ਕੇ ਰੱਖਿਆ ਹੈ। ਕਹਾਣੀਕਾਰ ਆਪਣੇ ਕਥਾ ਬਿਰਤਾਂਤ ਰਾਹੀਂ ਇਹਨਾਂ ਅਣਗੌਲੇ ਸਮੂਹਾਂ ਨੂੰ ਉਭਾਰ ਕੇ ਅਲੱਗ ਹੋਂਦ ਵਜੋਂ ਵਿਕਸਿਤ ਕਰਕੇ ਵਿਚਾਰਧਾਰਾਈ ਸਿਰਜਣਾ ਕਰ ਰਿਹਾ ਹੈ।